ફકીરભાઇ ચૌહાણનો એક જ વાક્યમાં પરિચય એટલે સાચા કર્તવ્યનિષ્ઠ સમાજસેવક અને આજીવન શિક્ષક જેમણે આજીવન સેવાનો ભેખ ધારણ કર્યો છે. અને નામને અનુરૂપ ગુણ જાણે તેમનામાં સીંચી સીંચી ને ભર્યા છે. એવા વિરલ વ્યક્તિત્વનાં માલિક આ શાળા શિક્ષણ ધૂરા સંભાળી રહ્યા છે.

શ્રી ફકીરભાઇ ચૌહાણનો જન્મ ૧૯ મી મે ૧૯૩૮ ના રોજ ખૂબ જ ગરીબ કુટુંબમાં થયો હતો. અનેક વીટંબણાઓ, મુશ્કેલીઓ, દુઃખ સાથે બાળપણ વિતાવી પ્રાથમિક પરીક્ષા પાસ કરી શિક્ષકની નોકરી મેળવી. શિક્ષણનો જીવ એટલે આગળ અભ્યાસ કર્યો અને નોકરીની સાથે એસ.એસ.સી ની પરીક્ષા પાસ કરી. સ્વ મહેનતે આગળ વધવાની ઉંડી અંતર ઈચ્છાને કારણે ૨૧ મી જૂન ૧૯૬૩ ના રોજ 'ભારતીશ વિદ્યાગૃહ'નામે ટયુશન કલાસ શરૂ કર્યા અને તે ટ્યુશન કલાસને મહેનત, આગવી સૂઝ તથા આત્મવિશ્વાસ થી સફળતાની ચરમસીમા સુધી લઈ ગયા. વિદ્યાર્થીઓ તથા વાલીઓમાં પ્રિય બન્યા અને સમાજમાં પોતાની વિશેષ આગવી ઓળખ ઉભી કરી. શિક્ષણની સાથે રાજકારણમાં પ્રવેશ્યા અને તેમાં પણ સફળ રહ્યા !